Aking Araw

Makailang beses sa buhay ko, ngunit pabiro, na sinabihan akong "may araw ka din!" Ilang beses na kaya akong pinag-ukulan ng ganitong mga salita nang hindi ko narinig? Na pabulong, o maaaring pasigaw ngunit sa mga lingid na silid ng kongkreto o puso. At sinusino kaya: mga nahirapang estudyante, mga hindi naworkshop nang maayos, nag-iinarteng kaibigan na nakaligtaang himasin ang ego, isang nabigwasang kapatid, nasaling na magulang - ilan kaya sa mga dating kasintahan? - at isang estranghero sa dyip na inabot ang aking pamasahe sa drayber sa kabila ng pagwasak sa kanyang araw ng nagsusumigaw kong anghit.

Bilang sukli, isang walang pangalang "may araw ka rin!"

Sinuman siya, sila, o ikaw, baka ikaliligaya mong malaman. Alam ko na kasi kung kailan.

Bukas.